السبت - 14 أبريل 2018 - الساعة 05:53 م
إحدى الأسر(المعاريف) من جيراني في عدن.. قالت لي :(ياعم عبدان).. نبا منك خدمه.. قلت لهم :على عيني وراسي.. بس شوه من خدمه..؟ قالوا :بالله عليك أعمل معروف.. إذا هبيت لحج.. جزع لنا معاك(بيض بلدي).. كم مابتقدر.. ونحنا بنعطيك (البيس) قيمته.. أصل نباه (دوا).. قلت لهم :شومن بيس.. وشوه من قيمته.. عيب هذا الكلام.. نحنا جيران ونحنا(صحاب لحج) نعرف الاصول.. خلاص ابشروا طلبكم مستجاب.. وأعتبروا(البيض) عندكم.. ولايهمكم حتى اذا تبوا الدجاج حق لحج كلهم.. مع (بيضهم وطيورهم وديوكتهم) وزايد فوقهم(مشبك وقرمش ومضروب).. باجيبهم لكم ملات (عشره بوابير).. ولايهمكم انا هب كل (خميس) إلى بلادي (الوهط) بلحج.. لكم الا (بيض بلدي).. من الدجاج حقون (جدتي)_والله اني نسيت ان (جدتي) الله يرحمها_قد ماتت زمان(ايام الترك) لما كانوا في لحج.. قالت الاسره تمام يا(عم عبدان).. لاتنسانا الله يخليك.. قلت لهم خلاص.. عيب الله المستعان.. الى هنا والخبر مفهوم.. ان جيراني يبوا (بيض بلدي)..قولوا يا جماعه الخير ..هبيت (الوهط) عند اهلي وناسي..وعادني حتى ماشي جسيت ولا شربت حتى (قب ماي).. هبيت ساني.. من حافه لاحافه .. اتخبر وأسال .. يا خلق الله: شي معاكم(بيض بلدي)..! وكلما جزعت بيت قلولي.. وين انته تعيش ماشي عاد نربي دجاج.. ومن وين بيجينا البيض اللي تباه..؟ شوف بتحصل(بيض بلدي) عند (الرعيان).. قلت لهم منوه ذولا(الرعيان) يسكنوا في اطراف (الوهط) من جهه الغرب.. هم معاهم (دجاج) من حق البلاد.. ويبيعوا (بيض بلدي).. قلت لهم.. خلاص تمام بنشوف (الرعيان)..؟قالوا:هاذولا (الرعيان) يسكنوا في أطراف (الوهط) من جهة الغرب.. هم معاهم (دجاج) من حق البلاد ويبيعوا (بيض بلدي).. قلت لهم خلاص تمام بعده بانشوف (الرعيان).. قولوا ياناس هبيت لاعند (الرعيان) قالوا.. كنت بتزكن علينا من قبل(سبع ايام) انك تبا(بيض بلدي) قلت لهم :شوه دراني.. انا كنت احسب ان جدتي مكانيه حيه وان معاها (دجاج) من حقونا البلدي.. ماشي داري ان جدتي_وحتى امي_قد ماتوا زمان هم ودجاجهم ومواشيهم.. حتى خواتي ماتوا كلهم ماشي عاد باقي معاي الا (اخت وحده).. الله يخليها ويحفظها ويعطيها الصحه والعافيه_آمين_طيب يا(رعيان).. خلاص خلونا صحاب.. وشوفوا لي معاكم (بيض بلدي) من اي مكان.. اسالكم بالله افعلوا لي حل.. منشان تبيضوا وجهي عند جيراني.. والمسأله (بيض) ماشي نبا (جمل ولا حصان).. قولوا ياأهل الخير.. استحوا (الرعيان) فيني وكبرت في وجههم.. وعطوني(بيض ) كان مزكن لناس ثانيين.. لما عرفوا اني من (الوهط).. واني كتبت في الجرايد.. وقالوا انهم يشوفوا صورتي كل يوم... اعطيتهم (البيس) وشليت (البيض) وتوكلت على الله.. ورجعت من عند (الرعيان) ساني لابيتي في (الوهط).. وانا سير دلا.. دلا.. كما (العروسه) وكأن معاي(كنز) ومن شدة التعب.. وما ان وصلت البيت.. رقدت ودخلت في سابع نومه.. بعدما طرحت(البيض) عند راسي.. فجعان لاعاد يكسروه(الجهال).. وانا راقد.. جاني في الليل (بول).. قمت من النوم.. والله اني نسيت ان (البيض) مطروح جمبي.. ومع ساعه الشيطان_ولان الكرهبه طافي عليها وعلى (وزير السراج) لعنة الله.. دعست (البيض) برجولي الثنتين وتكسر كله.. ولابقيت حتى حبه سلم.. الا يا(ام الصبيان) ويا(ام الجان).. شوه هذي المصيبه.. وشوه هذا النحس وشوه هذا الدبور وهذي الشقابه.. لاحول ولاقوه الا بالله.. ذلحين شوه انا باقل لجيراني.. وهم كل يوم يتبالطوا علينا.. (تبا أدا وإلا تأديت والا المخبازه جمب البيت).. (بترقد عندنا والا المسجد برود).. لاقلت لهم ان البيض تكسربيقولوا.. (عمنا عبدان) ماشي يبا ينفعنا.. مامعاه الاجاب هذا العذر.. خلاص الله هوه العالم.. تصدقوا ان النوم طار من عيني.. كيف أفعل.. كيف سوي..؟ قمت اتصل بواحد جاري ساكن جمبي في (الوهط).. وقلت له بالقصه كلها.. قل لي:نحنا معانا دجاج.. باشوف كم بنحصل الصبح تحتهم (بيض).. ذلحين انته ارقد لك وبيقع خير لما الصبح.. وعلى قولت المثل :(الصباح رباح).. واشهد لكم بالله.. ماغمضت لي عين.. وقبل ماتقوم الطيور شليت نفسي وهبيت ساني لا عند جاري دقدق عليه الباب.... فتح لي ودخلت لاعنده.. وهب لا عند الدجاج حقونه.. وجاب (البيض) المطلوب.. وماصدقت اني لقيتهم.. وساني من صبح الله شليت (بابور انجيز) من الوهط لا عدن.. وانا ماسك (البيض) بيداتي الثنتين فجعان لاعاد يتكسروا.. وبعدين وين ودي وجهي من جيراني.. المهم قولوا وصلت لاعند بيت جيراني.. والكرهبه طفيت.. لعنة عليهم وعلى (وزير السراج).. ذلحين شوه يطلعني لاعند جيراني في (الدور الخامس).. شوه هذي المصيبه.. قلت لصاحب(البابور).. بالله أفعل معروف طلعني بالبابور لا (الدور الخامس).. قل لي :ذلحين انته من صدقك تباني طلعك بالبابور لا الدور الخامس.. عاد الله بيراجعك.. كيف بيمشي البابور في الدرج حقت العماره.. قلت له :خلاص بعطيك (كرا) وشلني فوق ظهرك.. انا فجعان لاعاد (البيض) يتكسر.. وقده البترول بينفعك.. وأحسن لك كون شل الركاب فوق ظهرك بلا تعب (البابور).. قولوا شلني (الدريول) فوق ظهره.. وبعد اول درجه طحست رجله وسقط وانا سقطت معاه.. وتكسر (البيض) كله.. شوه هذي المصيبه اللي حلت بنا.. قلت له :كيف الحل..؟ قال باوديك سوق الدجاج والحمام والطيور في السيله في الشيخ عثمان.. وهنوك بتلاقي (بيض بلدي).. وسمعت كلامه وشلني فوق ظهره لما السيله ودلونا على واحد اسمه(عبدالله المرتني) اشهر بايع(بيض بلدي).. ولقيت عنده مطلوبي مع قليل حوايج.. حياك الله يا(مرتني) والله انك اصيل تستحق الاحترام لانك عادك تبيع (بيض بلدي).. بس لو كان عاده معاك (بيض ديوكه).. كان بيكون تمام.. ضحك وقال :يا لحجي عيب عليك خليك البلاطه.. انا تعجبني كتاباتك في (عدن الغد).. أح يازمن وين هبوا(الدجاج البلدي والديوكه البلدي والبيض البلدي) حقون زمان..؟ بالله عليكم أسالوا اللي ودانا إلى.. (وحدة العصيد والسحاوق) بتلاقوا عنده الجواب..!
