الثلاثاء - 22 مايو 2018 - الساعة 07:05 م
مثلما هو في العنوان نتكلم اليوم عن هذه المنظمه واخواتها من المنظمات التي تعمل حاليا في الضالع،وزيما يقولوا "عاملين زحمه والخط الفاضي" والمتضرر الوحيد المواطن الضالعي المتهم بتلقي خدمات هذه المنظمات فيما الحقيقة أنه ورغم كل تلك الهوشه لا يتلقى سوى فتات الفتات بعدما ياخذوا منه كل تفاصيله الأسرية الممكنة وغير الممكنة.
وكما أشرنا أعلاه هذه منظمة "كير" مثلا جابوا مشروع مياه الى المنازل وعملوا استبيانات وعبوا الاستمارات وفحسوا خلق الله وسجلوا وبعدها وصلت "البوز" حقهم وقالوا لكل أسره "ثلاثه الف لتر" لثلاثه أشهر بمعدل "الف لتر" شهريا .. سكبوا الشهر الأول وللي يشتي حقه دفعه واحده سكبوا له،المشكله انهم وعدوا اغلبية الناس بالعوده لاستكمال المقرر لهم،لكن وحسب المندوبين قالوا خلاص قد رفعوا الاسماء كلها ووقعوا عليها انهم استكملوا الثلاثه الالف كلها.. هكذا سرقه عيني عينك،وللي يروح يهنجم عندهم يكملوا له حقه هههههههه.
..لا وكمان معهم ملحق للمشروع عباره عن "صابونه ودبه ماء" جابوها للمستودعات ويجي لك واحد يهودي ابن يهودي يشتي الناس كلها تخرج وهي صايمه تعمل طوابير قدام المستودعات عشان تستلم حقه الصابونه.. شفتوا كيف التكسب والتلذذ بمعاناة الناس وهمومهم دون وضع أدنى اعتبار لكرامة المواطن.. ياخي تعال خذ حقك الصابونه وديها خلف الشمس بخمس خلي الناس تصوم على مله..!
مش بس حاملي "الكير" فقط يعملوا كذا ،كمان منظمات اخرى على نفس الشاكله "الصيت صيت واللقيه سود" منها على سبيل المثال (انقاذ واكسفام ومرسي كور واكتد)ووو ..الخ .. وللامانة مثل هذه المنظمات معظم عملها تتم بطريقة استخباراتية في الدرجة الأولى تنفيذا لسياسات داعميها، ولهذا تجدهم يعملون على استغلال حاجة الناس لدعمهم دون أن يجدوا جهة مسؤولة تتفق معهم على ضوابط محددة تقنن عملهم الميداني وتؤطره وفق عادات وتقاليد مجتمعاتنا.. مش كذا يتركوا لهم الحبل على القارب وهم مايقصروا يجيبوا صابونه او كيس رز صيني وياخذوا مقابلها أدق التفاصيل حتى اسم الجده السابعه وأيش كانت تعمل وايش لابسه وكم رقم تلفونها وبطاقتها ووو وهلم جرا ..!!
مثال آخر منظمة اكتد .. معهم سله غذائية يوصلوا لمنطقة فيها مثلا عدد الأسر المستحقه 200 أسره يقلك نحن با نعطيكم 20 حاله، وخلوا المناديب يتمشكلوا مع الناس لا وكمان عليها نزولات وتاكيدات واجتماعات وتشكيل فرق نسائية ورجاليه وانتخابات وتعبئة الاستمارات.. ووو.. "اللهم اني صايم"..!
الكلام نوجهه للاخ المحافظ علي مقبل والاخ الوكيل مدير عام التخطيط نبيل العفيف ،مثل هذه المنظمات ال"هشك بشك" يا سياده المسؤولين بحاجة الى مراجعة شامله لما يقومون به ومراقبة عملهم الميداني أول بأول وفق معايير صحيحه وواقعية ومدروسة تعمل على تلبية احتياجات الناس فعلا مش بهذه الطريقة "الهوشلية" مع الاسف الشديد..!!
عموما.. هذا فقط غيض من فيض وقليل من كثير لمساوئ هذه المنظمات .. يعني بالعاميه "لقوطنا الطافي الطافي" أما للي عاده مخبئ با نحفر عليه ان شاء الله بعد الصوم ونخرجه على شكل تحقيقات واستطلاعات صحفية..!
..
المهم با يقفز لك الان واحد من المتمصلحين والمتكسبين من وراء هذه المنظمات ويسكع لنا درس في الوطنية وأننا نحارب أرزاق الناس وووو .. اقوله مقدما "سكه لك من هذه الفسفسه نحن نحترم أي منظمة تحترم مجتمعنا وتسعى قولا وعملا لمساعدتهم مثل منظمة أطباء بلا حدود وكمان منظمة الغذاء العالمي وعمنا سلمان وهلال زايد الخير وكل من يقدم لهذا المجتمع المغلوب على أمره حاجه تستاهل حد يشيد بها ..
