السبت - 06 أكتوبر 2018 - الساعة 06:08 م
أتصل بي الأسبوع الماضي.. عدد كبير من المتقاعدين والمتقاعدات.. العسكريين والأمنيين- وبالذات – من اللي يستلموا مشاهراتهم من ((الكريمي)).. وبعضهم عبر ((المعسكرات )) وقالوا : ((يالحجي .. المقال حقك اللي كتبته يوم الحد اللي هب .. عن تكريم الكلاب المتقاعدين في كولومبيا .. كان مقال في محله .. ولاقى ارتياح كبير عند المتقاعدين العسكريين والأمنيين .. وعند اللي مكانهم فوق الخدمه – ولا كان أبوها خدمة على هذي العيشه النكد .. والله يالحجي أن اللي كتبته صحيح ميه في الميه.. نحنا اصبحنا معذبين منشان نلاقي مشاهراتنا .. تصدق يالحجي أن المشاهره حقت الشهر اللي هب .. أستلمناها بشق الأنفس من الكريمي وبعضنا وصل لما عند التاقه .. وقوله .. خلاص الصرف توقف .. شوه هذا التعب والنكد .. لنا من يومين وبعضنا من ثلاث أيام ماسكين طوابير .. وفي الأخير يقلو لك .. خلاص ..
بالله عليك يالحجي كيف تشوف هذا الخبر ..؟ شوه بيكون حالك ..؟ قدك عند التاقه حقت شقاديف شقاديفهم .. يجوا عويله جهال من حوقن أمس .. يقولوا لك خلاص .. وأنته مسبع مربع ولابس طربوش.. وجزمات .. وفوق كتفك الله يعلم كم نجوم وطيور وعصافير ودجاج.. يعني مسخره وقلة حياء .. تسألهم مالكم وقفتوا الصرف..؟ يقولوا لك ذلحين بنصرف للشهداء والجرحى.. المهم تبالك عذرو والا حمارو.. بالله عليك يالحجي .. وين هذا اللي اسمه ((خلاص)) والله لو نلاقيه .. بانسحبه سحب من رجوله.. قدنا جلوس غلى هذي المشاهره الطيسي طرنفيسي .. وعادهم في الكريمي يقولوك خلاص .. وفي البريد كماهم خلاص.. وفي المعسكر .. خلاص.. والا يشلوا عليك (نص المشاهره) ويخلوك تروح عند لنسانه حقتك تبكي .. وهذا يجري في اكثر من معسكر .. وفي كثر من مكان يتم فيه صرف المشاهرات للعسكريين)) ..
والله ياخواني واحد عسكري محترم .. من عيال أبين أتصل بي الساعه ((تسع)) في الليل يوم السبت قبل الماضي .. وقل لي : ((يالحجي .. ياعبدان دهيس .. أنته تاج راسنا ومعبر عن هومنا .. والله تعجبنا كتاباتك ((كلام باللحجي)) في (عدن الغد) .. ونحنا نتابعك من زمان وعادك في (صوت العمال) .. لما كنت تكتب (بنص عين).. وفي جريدة (الطريق) .. )) قلت له : مرحبا .. أهلا وسهلا .. قال ((أنا كلمك ذلحين من عند الكريمي البريمي.. لنا ثلاث أيام مراضيح ومطبرين ومطرلبين... منشان المشاهرة.. وفي الأخير قفلوا التاقه.. قالوا اللجنه نعم قالت خلاص .. شوه لمهات أمهاتنا وجدات جداتنا من اللجنه.. نحنا ميتين صبحه .. نبا مشاهراتنا..)) كلمني كلام كثير .. يقطع القلب.. لنسان ماشي معاه حتى (كرا البابور) اللي بيوديه لا أبين .. لاحول ولاقوة الا بالله ..وختم كلامه معاي ..((أشهد عليهم يالحجي.. أشهد على الحكومه الفاسدة الضايعه..))والله ياخواني تصدقوا .. أن عقداء ونقباء ورواد .. أصبحوا يبيعوا .. (باجيه وسمبوسه ومدربش وعتر سمبره جرم) .. وبعضهم يشقى فوق جاري جمل.. وبعضهم يسوق بابور أو سيكل نار.. منشان يعيشوا هم وجهالهم .. عسكريين كبار.. خريجين من الأتحادالسوفيتي ومن كوبا .. ومن ألمانيا .. أيام العز.. ومعاهم ((دبلوم أحمر)) .. أصبحوا مراجيم في الرصده .. وآخر الشهر .. يمسكوا طوابير منشان المشاهره .. والله إن هذا عيب وخزى في وجه الشرعيه .. في أيام ((بريطانيه)).. كانوا يجيبوا لك المشاهره آخر الشهر بالوفاء والتمام داخل ((بنكس)) بكل إحترام مع تعظيم سلام.. وفي أيام (الحزب).. كانت الأمور مضبوطه ومزروره زرور .. ومن يوم مادخلنا ((وحده العصيد والسحاوق )) .. ومن يوم ماقعت حرب (أربعه وتسعين).. أعتصدت الدنيا عصيد.. (سلته مع حلبة) وجت حرب (الحوثيين والشرعيه) وزاد الماي على الطحين ... اللهم لاشماته .. على الحال اللى نحنا فيه..!
